Dansað í Dorkypark

Ásrún Magnúsdóttir, þriðja árs nemandi samtímadansbrautar Listaháskóla Íslands, hefur nú hafið starfsþjálfun hjá hinum argentínska danshöfundi Constönzu Macras en hún fer fyrir Dokypark, hinum heimsþekkta dansflokki sem hefur aðsetur í Berlín. Ásrún tekur þátt í rannsóknarvinnu á nýju verki fyrir 10 dansara sem ber vinnuheitið BERLIN og verður frumsýnt seinna í vetur auk þess sem hún tekur þátt í spunavinnu þar sem efniviður sýningarinnar er skapaður.

Constanza Macras og hópurinn hennar Dorkypark varð frægur á einum degi þegar leikhússtjóri Schaubühne í Berlín, keypti réttinn að fyrsta verkinu hennar Back to the Present. Á einum degi fór Macras úr því að vera neðanjarðarlistamaður í yfirgefnu verksmiðjurými yfir í að vera einn fremsti danslistamaður samtímans með aðsetur í einu virtasta leikhús Evrópu. Í dag er Dorkypark bókað með óuppsett verk langt fram í tímann út um víða veröld.