Íslenski dansflokkurinn var kallaður stjarna danshátíðar í Þýskalandi

Monday, 10. May 2010

Gagnrýnandi átti ekki til orð yfir þeirri fjölbreytni og hæfileikum sem koma frá Íslandi.

Þýskir gagnrýnendur voru yfir sig hrifnir af sýningu Íslenska dansflokksins á danshátíð í Bremen sem haldin var dagana 9.-17. apríl. Uppselt var á sýningu flokksins en Íd bauð gestum hátíðarinnar upp á fjölbreytt kvöld með þremur mjög ólíkum verkum sem sýndu vel breidd dansflokksins. Á dagskránni voru tvö verk eftir þekkta og virta danshöfunda. Fyrst ber að nefna Grímuverðlaunaverkið Kvart eftir norðmanninn Jo Strömgren, en Kvart er magnað dansverk sem krefst mikillar færni af dönsurunum. Endastöð eftir Svíann Alexander Ekman er svo létt dansleikhúsverk sem kitlar hláturtaugarnar. Þriðja verkið var Heilabrot eftir Brian Gerke og Steinunni Ketilsdóttur sem er nýtt og ferskt tvíeyki frá Íslandi þekkt fyrir kómíska, jafnvel grátbroslega, og óhefðbundna sköpun.

Blaðið Die Tageszeitung sagði að Íslenski dansflokkurinn hefði verið óvænt stjarna hátíðarinnar. Gagnrýnandi blaðsins átti ekki til orð yfir þeirri fjölbreytni og hæfileikum sem koma frá Íslandi og sagði meðal annars „Vegna landfræðilegrar staðsetningar sinnar er flokkurinn einangraður og hefur þar af leiðandi tileinkað sér mikla fjölbreytni– verkin sem flokkurinn sýndi voru á ótrúlega breiðum skala, allt frá óheflaðri „trash“ list yfir í dansflugelda í anda svanavatnsins. Það virðist einnig sem að þetta kalda loftslag ali af sér virkilega skemmtilegan húmor“

Gagnrýnendur Kreiszeitung Bremen og Augsburger Allgemeine hrósuðu dönsurunum fyrir tæknilega fullkomnun en einnig og þá sérstaklega fyrir leiklistarhæfileika þeirra og héldu þeir varla vatni yfir frammistöðu dansaranna í hinu mjög svo kómíska verki Endastöð, þar sem þau túlka eldra fólk í leit sinni að æskunni.

Félag íslenskra listdansara dance@dance.is www.dance.is