Lög félagsins

1. gr. Heiti félagsins er Félag íslenskra listdansara og er lögheimili þess í Reykjavík.

2. gr Markmið félagsins er:

1. Að gæta hagsmuna íslenskra danslistamanna og efla danslistina á Íslandi.
2. Að reyna að hafa áhrif á úthlutun fjár- og styrkveitinga til listdansmála.

3. gr. Ákvæði um inngöngu í félagið eru þessi:

1. Umsókn um inngöngu í félagið skal vera skrifleg.
2. Umsækjandi sé orðinn 18 ára og hafi lokið námi í listdansi á framhaldsskólastigi eða sem samsvarar “intermediate” stigi.
3. Umsækjandi skal geta uppfyllt eitt af eftirtöldum skilyrðum:
   1. a. Hafa komið fram sem listdansari við viðurkennda listastofnun.
   2. b. Hafa lokið kennaraprófi frá innlendum og/eða erlendum viðurkenndum skóla.
   3. c. Hafa lokið dansaraprófi frá innlendum og/eða erlendum viðurkenndum skóla eða sýna skriflega umsögn kennara.
4. Hver umsókn skal metin af stjórn félagsins og borin til samþykktar á aðalfundi eða almennum félagsfundi.

4. gr. Árgjald skal ákveðið á aðalfundi og greiðist fyrirfram.

5. gr. Greiði félagi ekki fallin gjöld sín á aðalfundi, missir hann atkvæðisrétt sinn á fundum félagsins, þar til hann hefur greitt þau að fullu. Hafi hann ekki greitt gjöld sín í full 2 ár, telst hann ekki lengur í félaginu.

6. gr. Aðalfundur skal haldinn að ákvörðun stjórnar og skal hann boðaður með 10 daga fyrirvara ár hvert. Aðalfundur telst löglegur ef löglega er til hans boðað. Fyrir aðalfund skal leggja skýrslu stjórnar og reikninga félagsins. Þá skal kjósa fimm manna stjórn, hvern fulltrúa til tveggja ára í senn. Kjósa skal formann og ritara eitt árið og gjaldkera og tvo meðstjórnendur hitt árið ásamt tveim endurskoðendum árlega. Stjórn kjósi fulltrúa sem mæti fyrir hönd félagsins á fund þeirra samtaka sem félagið á aðild að. Stjórnin boðar til félagsfundar svo oft sem hún telur æskilegt og tilefni gefst til. Einnig geta félagsmenn óskað eftir fundi ef svo ber undir. Fundarboðið skal vera skriflegt.

7. gr. Úrsögn úr félaginu skal vera skrifleg.

8. gr. Lögum félagsins má aðeins breyta á aðalfundi og til þess þarf meirihluti atkvæða þeirra félaga sem mættir eru.